Con sabagay magayon man an ginibong ito ni congressman
dahil masque papa-no egua siya nin mahohobon na guiromduman can mga parabulang
na siya gapatupada sa sadiri niya mismong laguerta.
Sa bilog na Pilipinas siguro iyo sana ini an congressman na gapatupada
sa sadiri niyang langag!
Sa Febrero 22, 2004 an saramucan sa Palarong Bicol oya sa satuyang provincia.
Iyo ini an pigmitingan can mga taga DepEd boda ni gobernador asin iba
pang invuelto sa maabot na palaro. Alagad an camuromundo sagcod sa ngonian
dae pa narerepair an satuyang sports complex. Segun sa sabi-sabi an bahala
daa can pagparepair iyo daa si Congressman Tupada alagad dae pa man siempre
gaporoon. An caherac-herac caini an satuyang mga atleta ta dapat magapoon
na sinda alagad dae macapoon ta an satuyang cawatan baging cawatan nin
mga carabao.
An satuyang swimming pool na dapat pagaporo-practisan can satuyang mga
swimmer dae man mapuwede ta maski carabao dae malabog ta an tubig puro
kiti-kiti. An satuya man na oval puro duhay nin carabao dahel sa egua
man nin gaparabakero diyan nin carabao mientras na dae pa nin gagamit
caini. Entonces saen magapra-ractice an satuyang mga paracawat? Con saindong
nagigiromduman an satuyang congressman an saro sa mga pigtawan niya nin
importancia sa saiyang campaña iyo an sports. Pero ta daw ta sagcod
ngonian masque magpagibo nin sungcaan si congressman dae ga pagibo? An
saiya pang tinawan nin importancia iyo an pagpatupada sa sadiri niyang
langag! Congressman tolong bulan na sana an Palarong Bicol caya dapat
maghiwas na!
Segun man sa nadangog co, si gobernador daa sa paagui can provincia preparado
na an duwang milyon na perac para sa mga atleta. Caya dae na nin masyadong
problema. An problema na sana entonces an cacawatan can mga atleta. Segun
pa man sa nadangog co, an maparticipar na mga atleta maabot sa quiñentos
(500). Iyo idtong mga nasa elementarya asin secondarya. Sa cadinaculan
na ining mga participantes dae niato ini dapat na sogot-sogoton sana.
Iyo digdi nacataya an satuyang casosopganan. Oya digdi nacataya an satuyang
mga caaquian na macawat ta nganing macatao nin daculang onra sa satong
mga cababanwa. Nin huli sa siring na mga cagamujan dapat an gabos na mga
imvuelto sa palarong ini maghiwas, magtarabang ta nganing matawan niato
nin magcacanigong suporta an satuyang mga atleta.
Hiwas mga cababanwa!
Grave an reboc ngonian sa samong opisina (Supreme Court). An target saro
man sana. Iyo man sana an samuyang Chief Justice Hilario Davide Jr. Piga-acusahan
siya na egua nin hokus-pokus na ginibo sa samuyang Judiciary Development
Fund. Ini acusasyon man sana. Dae pa man niato masasabing totoo an acusasyon
sa saiya sagcod na dae nin napapatunayan sa Senado con madagos an impeachment
laban que Chief Justic Davide. Ngonian con halimbawa man na madagos an
impeachment trial que Davide sa Senado asin napatunayan na dae siya nin
casalanan tapos an estoria. Alagad con mapatunayan na egua talaga nin
hokus-pokus na ginibo an samuyang boss, siguradong masunod siya que Erap
sa V. Luna Hospital o di caya sa Tanay, Rizal con haen si Erap nakakulong.
Mientras tanto angan-anganan niato an mga masunod na mangyayari ta con
baga sa umba iyo ini an paborito nin mga customer sa sarong restaurant.
Alatalaton ta! |
