Ano ang dahilan?
Masakit isipin na tayo ay pinababayaan ng mga nanunungkulan sa ating pamahalaan.
At, marahil, mahirap paniwalaan. Subalit ito ay tila nagiging totoo, para
sa marami nating mga kababayang Viracnon.
Kamakailan lamang ay pinayagang muli ni Mayor Alberto ang pagpasok ng
mga traysikel mula sa munisipyo ng San Miguel (at ang iba ay mula naman
sa Bato) upang maghanapbuhay sa loob ng munisipyo ng Virac. Ito ay lantarang
paglabag sa RA 4136 at 7160, na mas kilala sa tawag na Local Government
Code of 1991.
At hindi lamang iyan. May ordinansang ipinasa ang Sangguniang Bayan ng
Virac na nagbabawal sa mga traysikel mula sa ibang munisipyo na magbiyahe
sa Virac, isa itong hakbang na siya (Alberto) mismo ang pumirma upang
maisabatas.
Hindi tuloy malaman ng kaniyang mga kababayan kung ano nga bang talaga
ang tunay na motibo sa likod ng biglang paglambot ng tanggapan ni Alberto
ukol sa pagpapatupad ng nasabing batas. Walang ibang makitang dahilan
kundi "konsiderasyong pulitikal". Mag-eeleksiyon na raw kasi.
At huwag naman sanang paiikutin ang taumbayan sa pagbibigay ng mga napakakababaw
na dahilan. Bagkus, dapat na ipaliwanag ang isyu, harapin at huwag talikuran.
Dahil kung ito'y totoo, nangangahulugan lamang na pabaya ang ating mga
nanunungkulan at ang ating mga kapakanan at karapatan ay hindi napangangalagaan
sa ngalan ng pamumulitika!
Huwag naman sana! |