Makibaka!
Parang isang lumalagablab na apoy ang ginawang kilos-protesta ng PWEE!
Ang partisipasyong ginawa ng nagngangalit na taumbayan ay indikasyon lamang
ng poot at hinanakit ng mga konsumidores ng kuryente sa lalawigan sa tila
lantarang panggigipit sa kanila ng pamunuan ng Ficelco.
Kinakitaan ng partisipasyon ang nasabing rally ng mga taga iba't-ibang
barangay at munisipyo sa buong lalawigan.
Aabot sa humigit-kumulang otso pesos ang kada kilowatt hour na konsumo
ng kuryente sa atin.
Noong nasa limang piso pa lamang ang singil nila sa kada kilowatt hour
ay tayo na yata ang isa, kung hindi man pinakamataas, ang singil sa kuryente
sa buong Pilipinas. At ngayon ngang mas mataas na ang singil, wala nang
duda, sa pakiramdam ng mga Catandunganon, na tayo na nga ang numero uno
sa buong bansa. At iyan ay sa kabila ng pagiging isa sa pinakamahirap
na lalawigan sa buong Pilipinas.
Ano pa ba ang aasahan ng ating industriya ng turismo sa lalawigan kung
ganito na ang sitwasyon sa atin? May mga magnanais pa kayang mag-invest
dito sa Catanduanes? |