Sa kanilang inisyal na imbestigasyon ukol sa nasabing
pangyayari, lumalabas na nangyari ang insidente ng pamamaril habang nakikipaglaro
ng baraha sa kaniyang mga kaibigan ang biktima. Si Briongos, kasama sina
Rey Rodriguez, isang nagngangalang Boy Tatoo, at isa pang lalaki na nakilala
lamang sa tawag na Holo, lahat mga residente ng barangay, ay nagkakasayahan
nang bigla na lamang silang nagulantang dahil sa isang malakas na putok.
Bigla na lamang umano na tumimbuwang ang biktima mula sa kaniyang pagkakaupo.
Bumagsak ito sa sahig na duguan. Nang tulungan ng kaniyang mga kaibigan
ang biktimang si Briongos, napansin nila ang pagbulwak ng dugo mula sa
kaniyang leeg. Itinuro ng mga nakasaksi ang isang Jessie Tarrobal, isang
residente ng Salvacion St. ng nasabi ring lugar, bilang siyang bumaril
sa biktima.
Ayon sa kanila, binaril ng suspek si Briongos ng malapitan. Dagdag pa
ng mga ito, mahigit-kumulang sa dalawang metro lamang umano ang layo ng
suspek nang paputukan nito ang biktima. Tinamaan sa kanang bahagi ng kaniyang
leeg si Briongos.
Lumabas sa imbestigasyon ng pulisya, at base na rin sa pahayag ng mga
saksi, na isang sumpak o homemade na baril ang ginamit ng suspek sa pamamaril.
Agad na tumakas si Tarrobal matapos ang insidente.Ayon pa sa PNP, isang
matagal nang alitan sa pagitan ng suspek at ng biktima ang siyang nakikita
nilang anggulo sa pamamaril.
|