Sang-ayon sa kaniya, ang kanilang mga miyembro ay
legal na bumibiyahe ng kanilang mga PUVs, katulad ng dyip, van at multi-cab,
sa rutang San Miguel-Virac at pabalik. Subalit, nitong mga nakaraang linggo
umano ay malaki ang naging kabawasan sa kanilang kita dahil sa ilegal
umanong pagpapatupad ng batas ng mga namumuno sa munisipyo ng Virac. Kaniyang
tinukoy ang aniya ay biglaang pagpayag ng tanggapan ni Alberto na papasukin
para magbiyahe sa loob ng munisipyo ng Virac ang mga traysikel mula Bato
at San Miguel.
Matatandaang pinatupad noon ang pagbabawal sa mga pampasaherong traysikel
mula sa ibang bayan na pumasok at bumiyahe sa loob ng Virac, base na rin
sa isang ordinansang ipinasa at inaprubahan ng Sangguniang Bayan ng Virac.
At, ayon pa sa opisyal ng transport group, hindi lamang umano ordinansa
kundi pambansang mga batas, ang RA 4136 at 7160 o Local Government Code,
ang lantarang nilabag ng tanggapan ng alkalde ng Virac.
Ang opisyal ng nasabing transport group ay nagsabi pa na matagal na umano
nilang ipinaabot sa tanggapan ni Alberto ang isyu subalit hindi umano
ito inaksyunan agad. At nang tumugon naman daw ito sa kanilang problema,
sinabi raw sa kanila ni Virac Municipal Administrator Marino Ubalde na
kinailangan na payagang bumiyahe sa loob ng munisipyo ng Virac ang mga
traysikel dahil pinaalis na diumano ang mga ito sa paradahan sa harap
ng Ficelco dahil pagmamay-ari raw ito ng isang pribadong tao. Na siya
namang ipinagtaka ng transport group dahil ang nasabing paradahan ay sidewalk,
sa gilid mismo ng kalsada, at wala umanong ibang nagmamay-ari kundi ang
pamahalaan. "Pina-iikot ba kami nina Mayor at Administrator? Ano
ang akala nila sa amin, bobo? Kahit sintu-sinto ay sasabihin sa kanila
na gobyerno ang may-ari nun at hindi kung sinong Pontio Pilato!"
Ang nakikita umano nilang dahilan sa pagpayag ng tanggapan ni Alberto
ay pulitika. "Di ba't malapit na ang eleksyon? Bawas boto nga naman
kung ipagbabawal nila ang pagpasok ng mga traysi sa Virac."
Kinuwestiyon din ng grupo ang anila ay pakikialam ng mga Virac Traffic
Enforcers sa panghuhuli ng mga traffic violators at pagkuha ng mga lisensya
nito. "Dapat siguro mag-aral itong sina Cito at Ubalde. Hindi ba
nila alam na hindi puwedeng manghuli ang mga traffic enforcers kung hindi
sila deputized ng LTO? Kung deputized sila, bakit wala silang ticket galing
sa LTO? Wala silang karapatang manghuli sa mga motorista at lalo na ang
mangumpiska ng lisensya. Dapat na malaman ito ng publiko!"
Sa ngayon ay pinag-iisipan na umano ng SMMVTA ang posibleng legal na aksyon
na maaari nilang gawin ukol sa isyu.
|
